काठमाडौं। प्रधानमन्त्री पुष्पकमल दाहाल प्रचण्डले मिटर ब्याजी पीडित किसानका समस्या समाधान गर्न गृहसचिवलाई निर्देशन दिएका छन्। महोत्तरीको बर्दिवासदेखि काठमाडौंसम्मको यात्रामा निस्किएका मिटरब्याजी पीडित किसानका समस्या समाधान गर्न र घर फर्किने वातावरण बनाउन गृहसचिवमार्फत् प्रधानमन्त्री ‘प्रचण्ड’ले निर्देशन दिएको प्रधानमन्त्रीका प्रेस संयोजक सूर्यकिरण शर्माले जानकारी दिए।
सोही निर्देशन बमोजिम मकवानपुरका सीडीओ राजेन्द्रदेव पाण्डेले किसानसँग छलफल गरी सरकार कानुन बनाउने काममा लागेको र मिटरब्याजीका विरुद्ध सरकारले मुद्धा पनि चलाइरहेको भन्दै घर फर्किन आवश्यक सहयोग गर्ने प्रतिवद्धता व्यक्त गरे।
सीडीओ पाण्डेसँगको छलफलमा पीडित किसानले आफूहरु एउटा अभियानमा भएको र कानुन नबन्दासम्म नफर्कने बताएका थिए ।
किसानले सो अवसरमा काठमाडौंसम्मको यात्राका लागि आफूहरूलाई चिसो हुने र कम्बलको व्यवस्था गर्न र सवारीको प्रबन्ध मिलाउन आग्रह गरेका थिए । प्रमुख जिल्ला अधिकारी पाण्डेले किसानलाई कम्बलको व्यवस्था गरेका थिए।
पीडित किसानको समस्या समाधान गर्न गृहमन्त्रालयले कानुनको मस्यौदा बनाएर कानुन मन्त्रालयमा पठाइसकेको प्रधानमन्त्रीको सचिवालयले जनाएको छ। सरकारले ३ सय ५० जना मिटर ब्याजीहरूलाई कारबाही नै गरिसकेको छ।
प्रेस संयोजनक शर्माले भने, ‘प्रधानमन्त्रीले कानुन सचिवलाई कानुनलाई प्रस्तावको रुपमा आज अपरान्ह बस्ने मन्त्रिपरिषद् ल्याउन र संसदमा दर्ता गर्न भनिसक्नुभएको छ र आजभोलि नै त्यो कानुन संसदमा दर्ता हुन जान्छ । प्रधानमन्त्री मिटरब्याजी पीडित किसानको समस्या समाधान गर्न गम्भीर हुनुहुन्छ।’
प्रकाशित मिति: २०२३-०३-२४ , समय : ११:१६:०८ , ३ महिना अगाडि