०४ बैशाख २०८१, मंगलबार
2024-04-16

‘जनतासगँ माओवादी’ बिशेष रुपान्तरण अभियानको तयारी पुरा

मधेश प्रदेश सम्वाददाता- Aarya News

सर्लाही। नेकपा (माओवादी केन्द्र)ले देशैभरी एकसाथ सुरु गर्न लागेको ‘जनतासगँ माओेवादी’ बिशेष रुपान्तरण अभियानको तयारी सर्लाहीमा पनि पुरा भएको छ ।

शनिवार जिल्लाको २० पालिकाका दुई सयवटा वडामा एकैसाथ उद्घाटन हुनलागेको अभियानको सम्पुर्ण तयारी सम्पन्न गरिएको नेकपा (माओवादी केन्द्र) सर्लाहीले जनाएको हो । अभियानको लागि पार्टीले जिल्लाका २० पालिकालाई ७ कमाण्ड क्षेत्रमा विभाजन गरेको छ । भने, प्रतेक कमाण्ड क्षेत्रको नेतृत्व केन्द्रिय सदस्यहरुलाई दिइएको छ ।

तिन महिना सम्म संचालन हुने अभियान अन्तरगत जिल्लाको बागमती नगरपालिका, बरहथवा नगरपालिका र बसबरिया गाउँपालिकाको ईन्चार्जको जिम्मा पार्टीका केन्द्रिय सदस्य राजु खड्कालाई तोकिएको छ । भने, हरिवन नगरपालिका, हरिपुर नगरपालिका र कविलासी नगरपलिकाको इन्चार्जको जिम्मेवारी केन्द्रिय सदस्य दिपक बहादुर योन्जन र एकराज थापालाई तोकिएको छ ।

यस्तै लालबन्दी नगरपालिका, चन्द्रनगर गाउँपालिका र चक्रघट्ट गाउँपालिकाको इन्चार्जको जिम्मा केन्द्रिय सदस्य सिता दहाललाई दिईएको छ । भने, ब्रम्हपुरी गाउँपालिका, मलंगवा नगरपालिका र कौडेना गाउँपालिकाको इन्चार्जको जिम्मा केन्द्रिय सदस्य ओहिद अन्सारीले पाएका छन् । यस्तै बलरा नगरपालिका र बिष्णु गाउँपालिकाको जिम्मा केन्द्रिय सदस्य रामचन्द्र सिङ कुशवाहले पाएका छन् ।

पार्टीले गोडैता नगरपालिका, धनकौल गाउँपालिका र रामनगर गाउँपालिकाको इन्चार्जको जिम्मेवारी सत्यनारायण भगतलाई दिएको छ । ७ मध्य तिन कमाण्ड क्षेत्रमा महोत्तरी, तिनमा रौतहट र एक कमाण्ड क्षेत्रमा सर्लाही निवासी केन्द्रिय सदस्यलाई इन्चार्जको जिम्मेवारी तोकेको हो । सबै कमाण्ड क्षेत्रमा तयारी बैठक तथा छलफल सम्पन्न भएको पार्टीले जनाएको छ ।

अभियानको शनिवार प्रधानमन्त्री तथा पार्टीका केन्द्रिय अध्यक्ष पुष्प कमल दहाल प्रचण्डले एकै साथ भर्चुअल माध्यमबाट उट्घाटन गर्ने तयारी छ । अभियान अन्तरगत पहिलो चरणमा उद्घाटन पछि गाउँ तथा वडा तहमा बैठक र छलफल चलाई उल्लेख गरिएको छ । भने, साथमा पार्टीका संगठित सदस्य नविकरण तथा नयाँ सदस्यता वितरण गरिने भएको छ ।

संगठित सदस्यहरुलाई समेत पार्टीले क्षमता र योग्यताको आधारमा विभिन्न समितिहरुका जिम्मेवारी दिने छ । सोही क्रममा पार्टीका विभिन्न समितिहरुलाई पुनः गठन गरिने पार्टीले जनाएको हो । अभियान अन्तरगतनै पार्टीका जनवर्गिय संगठनहरु समेत गाउँ र वडातहबाटै पुनःगठन गरिने उल्लेख गरिएको छ । यसले संगठनको विभिन्न समितिलाई पुनः ताजगिपन मिल्ने उल्लेख छ ।

क्रमैसगँ संगठनका नेतृत्वले अभियानकै क्रममा भुगोल र जनभावना बुझिसकेको अवस्थालाई मध्यनजर गर्दै जनताको घरदैलोमा पुग्ने दावी गरिएको छ । यसरी पार्टीको नेतृत्व गर्दै जनताको घर दैलोमा पुगेका नेताहरुले पार्टीले गरेका कामको बारेमा जानकारी गराउने छन् । भने, साथमा माओवादी पार्टीको नेतृत्वमा गर्नु पर्ने बाँकी काम, पार्टीका कमीकमजोरी र सच्याउन गर्नुपर्ने कामको बारेमा समेत सुझाव संकलन गर्ने छन् ।

अभियानकै क्रममा पार्टीबाट खटिएका नेतृत्वले संघ सरकारले गरिरहेका कामको राम्रो र नराम्रो पक्ष स्थानीय सरकारले गरेका राम्रा र नराम्रा पक्षको बारेमा छलफल गर्नुका साथै सुधारका लागि पहल समेत गर्ने पार्टीले जनाएको छ । नागरिकले पाएको दुखकष्ट समाधानको लागि आवश्कता अनुसार स्थानीय तथा अन्य सरकार बिरुद्ध संगठनले कडा संघर्षका कार्यक्रम समेत सार्वजनिक गर्ने उल्लेख गरिएको छ ।

प्रधानमन्त्री एवम् पार्टी अध्यक्ष प्रचण्डले शनिवार दिउँसो १ बजे काठमाण्डौको चन्द्रागिरि नगरपालिका वडा नम्बर २ को भट्टेडाँडाबाट देशभर एकसाथ अभियानको शुरु भएको घोषणा गर्ने तयारी छ ।

प्रकाशित मिति: २०२३-०९-०२ , समय : ०८:५७:०४ , ८ महिना अगाडि

error: Content is protected !!