०९ बैशाख २०८१, आइतबार
2024-04-21

पशुपतिनाथ मन्दिर क्षेत्रमा मासुजन्य पदार्थ एवं मदिरा बिक्रीमा रोक

आर्य न्युज /Aarya News

विराटनगर । पशुपतिनाथ मन्दिर क्षेत्रमा मासुजन्य पदार्थ एवं मदिरा बिक्रीमा रोक लगाइएको छ । महाशिवरात्रि पर्वलाई लक्षित गरी सो क्षेत्रमा रोक लगाइएको हो। यस वर्ष फागुन २५ गते शुक्रबार महाशिवरात्रि पर्व परेको छ ।

यतिखेर पाशुपति क्षेत्र महाशिवरात्रिको लागि सजावटको काम पनि सुरु भएको पशुपति विकास कोषले जनाएको छ ।कोषका अनुसार महाशिवरात्रिको दिन पुजा पाठ गर्न पशुपति क्षेत्रमा भक्तजन र साधुसन्तहरूको आउने क्रम सुरु भइसकेको जनाए।

जिल्ला प्रशासन कार्यालय, काठमाडौँले सूचना जारी गरी भोलि बुधबारदेखि फागुन २७ गतेसम्म गौशाला–मित्रपार्क सडकदेखि पूर्व,पशुपतिनाथ क्षेत्रको पूर्व सिमानादेखि पश्चिम,गौशाला–तिलगङ्गा चक्रपथदेखि उत्तर र मित्रपार्क–उमाकुण्ड–गौरीघाट हुँदै गुह्येश्वरीदेखि दक्षिणभित्रका सबै भागमा मासु र मदिरा बिक्रीमा रोक लगाएको छ ।

पर्वलाई अनुशासित,मर्यादित र व्यवस्थित बनाई भव्यरुपमा सम्पन्न गर्न र पाशुपत क्षेत्रभित्रको सुरक्षालगयात धार्मिक,सांस्कृतिक मर्यादा र पवित्रता कायम राख्न यस्तो रोक लगाइएको हो। पशुपतिनाथ क्षेत्रमा तोकिएका चारकिल्लाभित्र कसैले पनि मासु,मदिरा तथा नशालु पदार्थ उत्पादन,बेचबिखन,ओसारपसार,भण्डारण र सेवन गर्नसमेत नपाउने गरी पूर्णरुपमा रोक लगाउने निर्णय गरिएको विकास कोषले जनाएको छ ।

सो पर्वका अवसरमा पशुपतिनाथ क्षेत्र झकिझकाउ पारिँदैछ । मन्दिर आसपासका क्षेत्रमा फूल र बत्तीको सजावट सुरु भएको छ । पशुपति क्षेत्र विकास कोषले पाशुपत क्षेत्रमा सजावटको काम सुरु भएको जनाएको छ । मन्दिर आसपासका क्षेत्रमा सरसफाइदेखि फूल तथा विभिन्न रङले सिङ्गार्ने कामसम्म सुरु गरिएको कोषका सदस्यसचिव राजुकुमार खत्रीले राससलाई जानकारी दिए।

कोषले यस पटकको महाशिवरात्रिमा करिब २० लाख दर्शनार्थीले पशुपतिको दर्शन गर्ने अनुमान गरिएको बताए । पशुपति क्षेत्र विकास कोषले पशुपतिनाथको पूजाआराधनाका लागि पुगेका भक्तजनलाई व्यवस्थापनमा कुनै कमी नराखिको जनाएको छ ।

कोषले यस वर्ष कसैलाई पनि विशेष पासको व्यवस्था नगरिएको पनि जनाएको छ ।

प्रकाशित मिति: २०२४-०३-०५ , समय : १९:४९:४५ , २ महिना अगाडि

error: Content is protected !!