देवानगञ्ज । आज तराई क्षेत्रमा फागु अर्थात् होली पर्व मनाइँदैछ । वसन्त ऋतुको आगमनसँगै आपसी मेलमिलाप र सद्भावनाको सन्देश लिई आउने फागु पर्व हर्षोल्लासका साथ एकआपसमा रङ र लोला खेली मनाउने गरिन्छ ।
हिजो काठमाण्डौ उपत्यकासहित पहाडी क्षेत्रमा मनाईएको थियो भने आज तराईका जिल्लामा होली मनाइँदैछ। सरकारले हिजो पहाडी र हिमाली क्षेत्रमा सार्वजनिक बिदा दिएको थियो। आज तराईमा सार्वजनिक बिदा दिएको छ ।
असत्यमाथि सत्यको विजयको प्रतीक, पारिवारिक एवम् सामाजिक एकताको पर्वका रुपमा फागु पर्व मनाउने प्रचलन छ । हिरण्यकशिपुले बहिनी होलिकालाई दन्किरहेको आगोमा छोरा प्रल्हादसहित पस्न लगाउँदा होलिका भष्म भएकी र भक्त प्रल्हाद भने सकुशल निस्केको प्रसङ्ग पुराणमा उल्लेख छ ।
शक्तिको दुरुपयोग गर्ने होलिका मारिएको भन्दै होलिकादहन भनी चीरदाह गरेर आपसमा रङ्ग, अबीर लगाएर खुशीयाली मनाएर होली खेल्ने परम्पराको शुरुवात भएको मानिन्छ ।
प्रकाशित मिति: २०२४-०३-२५ , समय : १०:१०:१८ , १ महिना अगाडि